Boşanma sayının artmasına səbəb olan həm də Tiktok və İnstaqramda özünü "münasibət mütəxəssisi" kimi qələmə verən, əslində, özlərinin heç bir ciddi və uzunömürlü münasibəti olmayan şarlatan və maskalı insanlardır.

Axar.az xəbər verir ki, bu sözləri hüquqşünas Fərhad Mehdiyev qeyd edib.

“Məsələn, rəfiqəsi ilə kafedə oturan qız rəfiqəsini kameradan kənarlaşdırır. Masada 2 ədəd qədəh var və yazır: "Hər görüşünüz ilk görüşünüz kimi həyəcanlı olmalıdır". Bunu oxuyan 2 uşaq anası Fatmanisə gözləyir ki, əri evə əlində buket gəlsin. Günlük 30-40 manat qazanan əri Məmməd də uşağın repetitor pulunun vaxtının gəldiyini düşünərək, 1-2 saat artıq işləməli olur. Axşam evə gec gəlir, başını atıb yatır. Fatmanisə də düşünür ki, Məmməd onu artıq sevmir. Əslində isə Fatmanisəni sevməyə problemlər imkan vermir. Bir də bunu qeyd etməyi unutmuşdum: axı müxtəlif terapevtlər də Fatmanisəni inandırıb ki, taleyi öz əlindədir, özü işləyib milyoner ola bilər. O da boşanmaya ərizə verir, ailə olur pərişan”, - F.Mehdiyev bildirib.

Hüquqşünas əlavə edib ki, gənclər yuva qurmaq üçün evlənmir:

“İlkin tanışıqlıq vaxtı yaşadıqları o həyəcan üçün ailə qururlar, amma o həyəcan təbii olaraq kəsilir, o romantik görüşlər artıq olmur. Onların yerinə daha əvvəl valideynlərin çəkdiyi məişət problemləri üzə çıxır və həllini gözləyir - bunun da sonunun necə olduğu bəllidir”.