Fövqəladə Hallar Nazirliyinin 20 illik yubiley medalının təsis edilməsini layiqli hesab edirəm. Güclü yağışlar Azərbaycanda ciddi fəsadlar törətdi. Hökumət, dövlətimiz sağ olsun ki, müəyyən addımlar atdılar və buna görə zəhməti keçən hər kəsə təşəkkür edirəm.

Axar.az Teleqraf-a istinadla xəbər verir ki, bunu Milli Məclisin plenar iclasında deputat Razi Nurullayev deyib.

O qeyd edib ki, sadalanan hadisələrdə xüsusilə Daxili İşlər və Fövqəladə Hallar Nazirliyinin əməkdaşları gecə-gündüz çalışıb:

“Bununla bərabər deməliyəm ki, bu gün də evi suyun içində qalan və qapısı döyülməyən vətəndaşlar var. Təəssüflə bildirirəm ki, heç də bütün aidiyyəti dövlət qurumları işinin öhdəsindən gəlməyib, zamanında ciddi həyəcan siqnalı da verməyiblər.

Buradan Fövqəladə Hallar Nazirliyinə təşəkkürümü bildirmək istəyirəm. Cənab nazirə, müavinlərinə, bütün kollektivə "sağ ol" deyirəm. Yalnız onlar telefon zənglərimə cavab verib operativ qərar qəbul etdilər. Gözümüzün qabağında insanları xilas etdilər, günlərlə xidməti maşınlarda gecələdilər. Amma bu məsələdə aidiyyəti orqanların bir çoxunun laqeydliyinin şahidi olduq. Buna çox təəssüf edirəm. Hər bir dövlət qurumu üzərinə düşən vəzifəni vicdanla yerinə yetirməlidir. Bir daha FHN-nin bütün kollektivinə dərin təşəkkürümü bildirirəm və əminəm ki, onlar ən yüksək medal və təltiflərə layiqdirlər”.