Cahangir Hacıyevin xanımı Zamirə Hacıyevanın həbsi və ya qaçması barədə xəbərlər əsassızdır.

Bu sözləri Axar.az-a açıqlamasında Azərbaycan Beynəlxalq Bankının keçmiş sədri, hazırda həbsdə olan Cahangir Hacıyevin vəkili Aqil Layıcov deyib. Onun sözlərinə görə, Zamirə Hacıyeva artıq xeyli vaxtdır ki, xaricdə yaşayır:

"Zamirə Hacıyeva Azərbaycanda yaşamır, ona görə də onun həbsi barədə yayılan məlumat əsassızdır".

A.Layıcov həmçinin Nərimanov Rayon Məhkəməsi tərəfindən Z.Hacıyeva barədə həbs qətimkan tədbiri seçilməsi qərarından məlumatsız olduğunu vurğulayıb.

Qeyd edək ki, Z.Hacıyeva barəsində Nərimanov Məhkəməsi tərəfindən həbs qərarı seçilməsi barədə məlumatı və qərarın surətini "Basta" yayıb. Z.Hacıyeva heç bir zəruri sənəd təqdim etmədən Azərbaycan Beynəlxalq Bankından plastik kart almaqda və bu kart vasitəsilə faizsiz kredit adı altında dünyanın müxtəlif yerlərindəki ABB bankomatlarından külli miqdarda vəsait çıxarmaqda günahlandırılır.