Bu səhər “Araz” Supermarketin Zabitlər parkı filialından aldığım qaymaq məhsulunun daha əvvəl açıldığını və yenidən piştaxtaya qoyulduğunu təəssüf ki, çox gec fərq etdim. Bu hal istehlakçının etibarına açıq-aşkar hörmətsizlikdir. Əslində, bu gün eyni markanın — “Dr. Milk” ayranının da son istifadə tarixinin artıq keçdiyini (2 iyun) görəndə nəsə problem ola biləcəyini anlamalı idim. Hərçənd həmin məhsulun vitrindən yığışdırılması üçün əməkdaşlarınıza müraciət etdim.

Axar.az xəbər verir ki, bu sözləri tanınmış aparıcı Ramiz İdrisoğlu Feysbuk səhifəsində yazıb.

O, marketlərdə məhsullara nəzarətin zəif olduğunu qeyd edib və Qida Təhlükəsizliyi Agentliyinin (AQTA) məsələyə diqqət ayırmalı olduğunu bildirib:

“Marketlərdə məhsul nəzarəti niyə bu qədər zəifdir? Keyfiyyətə nə üçün bu qədər məsuliyyətsiz yanaşılır? “Araz” supermarket, əgər bu vəziyyətin əsas səbəbləri arasında əməkdaşların aşağı əmək haqqı, motivasiya çatışmazlığı və ya qeyri-kafi təlim durursa, bu siyasətə təcili şəkildə yenidən baxmağınızı tövsiyə edirəm. İstehlakçı olaraq belə halların təkrarlanması ciddi narahatlıq doğurur. Qida Təhlükəsizliyi Agentliyinin (AQTA) də bu məsələyə diqqət ayırması vacibdir. Təhlükəli və məsuliyyətsiz satış siyasətinə qarşı təxirəsalınmaz tədbirlərin görüləcəyinə ümid edirik”.