"Öz nüfuzunu qaldırmaq Azərbaycana hava və su kimi lazımdır".

Bu sözləri Bakı-2015 ilk Avropa Oyunları ilə bağlı Almaniyada yaşayan Azərbaycan yazıçısı Vüqar Dəmirbəyli Axar.az-a bildirib:

"İlk Avropa Oyunlarının Azərbaycanda keçirilməsini olduqca müsbət hadisə sayıram. Bu, Azərbaycanın dünya miqyasında çəkisinin artmasına, ölkəmizin yaxşı tərəfdən tanınmasına daha da kömək edəcək. Bu gün müsbət imic yaratmaq, öz nüfuzunu qaldırmaq Azərbaycana hava və su kimi lazımdır, xüsusən də, MDB və Avropa miqyasında. Beynəlxalq idman yarışları bu baxımdan olduqca gözəl imkan yaradır. Doğrudur, mən uzaqdan da olsa, bu yarışlarla bağlı Azərbaycandan şikayətlər də eşidirəm. Fəqət, əgər bu cür çətinliklər varsa da, bunlar, mənim zənnimcə, ötəri bir şey olmalıdır. İdman yarışları onların keçirildiyi ölkəyə qazanc gətirir – başqa ölkələrə verilən canlı yayımlar, reklam və s. vasitəsi ilə. Bir də bu məqsədlə tikilən binalar, stadionlar, aparılan abadlıq işləri yenə də axırda Azərbaycana qalacaq. Qoy İlk Avropa Oyunları uğurlu olsun!"
Xatırladaq ki, 12-28 iyun tarixində ölkəmizdə keçiriləcək Birinci Avropa Oyunlarına 9 gün qalıb