Millət vəkili Qənirə Paşayeva Türkiyədə Kırşəhər Kitab Fuarının açılışında çıxış edib.

Kult.az xəbər verir ki, Qənirə Paşayeva çıxışında türk dünyasının siyasətçilərinə, aydınlarına, yazar, şair, araşdırmaçı və jurnalistlərinə üz tutaraq, türklərin müxtəlif bölgələrdə yaşadığı ağrı-acılara xüsusi həssaslıq göstərməyə çağırıb.

“Biz ilk növbədə bir-birimizi daha yaxından tanımalıyıq, ortaq tariximizi, köklərimizi, mədəniyyətimizi, ədəbiyyatımızı, musiqimizi, keçmiş və bu günümüzü, problemlərimizi, gələcəyə baxışlarımızı gənclərimizin daha yaxşı bilməsinə çalışmalıyıq. Güc birlikdədir və birlikdə bizə olunan ədalətsizliklərə qarşı daha güclü mübarizə apara bilərik”, - millət vəkili deyib.

Beynəlxalq Kitab Fuarının açılışına Azərbaycanı “Fəxri qonaq” kimi dəvət etdikləri üçün Kırşəhər bələdiyyəsi və valiliyinə təşəkkürünü bildirən Qənirə Paşayeva iştirakçılara Türkiyədə yeni çapdan çıxmış “Turan yolçusu” və “Eşq yolçusu” kitablarını hədiyyə edib.