Tovuz şəhəri Puşkin adına orta məktəbdə millət vəkili Qənirə Paşayevanın təşəbbüsü, Avrasiya Beynəlxalq Araşdırmalar İnstitutu İB-nin, Tovuz rayon icra hakimiyyətinin, Tovuz rayon təhsil şöbəsinin təşilatçılığı ilə yazıçı-publisist Yunus Oğuzun oxucularla görüşü kecirilib.

Kult.az xəbər verir ki, görüşdə şəhər ictimaiyyəti, kitabsevərlər və rayonun kəndlərindən müxtəlif məktəblərin nümayəndələri və kənd sakinləri iştirak ediblər. Tədbiri giriş sözü ilə açan millət vəkili Qənirə Paşayeva hər bir azərbaycanlının tariximizi öyrənməsinin vacibliyini vurğulayıb.

Millət vəkili məruzəsində Yunus Oğuzun kitablarının Azərbaycan tarixi, vətənpərvərlik mövzularında əsl mövqeyindən və əhəmiyyətindən danışıb, bu kitablarda tariximizin, milli və mənəvi dəyərlərimizin təbliğindən bəhs edib.

Y.Oğuz Q.Paşayevanın çıxışını davam etdirərək “Tarix nədir və nə üçün bilməliyik?” mövzusunda məruzə ilə çıxış edib.

Yazıçı daha sonra tədbir iştirakcılarının suallarını cavablandırıb, Tovuz ictimaiyyətinə və şagirdlərə 160-dan çox imzalı kitab paylayıb.

Sonda Tovuz rayon icra hakimiyyətinin rəhbərliyi, Tovuz rayon təhsil şöbəsi və bir sıra məktəblərin fəal müəllimləri ilə fikir mübadiləsi aparılıb, gənclərlə kitablar ətrafında görüş və müzakirələrin artmasının önəmindən danışılıb.