5 mart tarixində keçiriləcək “Sabah həmişə var” adlı ilk kitabımın təqdimat mərasimini koronavirusa görə təxirə salmağı düşünmürəm. Tədbirləri təxirə salan insanların məntiqi ilə düşünsək, gərək sandığın içinə girib, çölə çıxmayaq.

Bu sözləri Kult.az-a Jurnalist Ekspert Mərkəzinin (JEM) sədri Ceyhun Musaoğlu 5 mart tarixində ilk kitabının Monte Kristo restoranında keçiriləcək təqdimat mərasimi ilə bağlı danışarkən deyib.

C.Musaoğlu deyib ki, Azərbaycanda sərhəddən keçən cəmi iki nəfərdə bu virusla bağlı şübhələr olub və onlar karantinə götürülüb:

“Bizim ölkədə belə viruslar heç vaxt at oynada bilməyib. Hər il bir adda virus peyda olur. Kim təsdiqləyə bilər ki, hansısa belə qondarma virusdan kiminsə yaxını, qohumu dünyasını dəyişib? Bütün bu viruslar sadəcə informasiya hücumudur. Tədbirləri təxirə salan insanların məntiq ilə düşünsək, gərək sandığın içinə girib, çölə çıxmayaq. Necə ki, ötən illərdə müxtəlif adda viruslar olmuşdu, gələn illərdə də belə viruslar olacaq. Həyatsa davam edir. Biz xəstəliklər barədə düşündükcə xəstəlik tapırıq. Bu məntiq elmi cəhətdən tam sübut olunub. Haqqında danışılan virus bizim ölkənin daxilində yoxdur, o hava yolu ilə keçmir, xaricdən gələn hər bir insan da xüsusi qaydada yoxlanılır”.

Xatırladaq ki, koronavirus təhlükəsi ilə əlaqədar bağça, məktəb və universitetlərdə 10 marta qədər tətil elan edilib, xalq artisti Röya 6-7-8 aprel tarixlərindəki, “Bu şəhərdə” isə bu gündən 8 marta qədər nəzərdə tutulan konsertlərini təxirə salıb.