Nobel mükafatlı türk yazar Orxan Pamuk Amerikada satışa çıxarılan "Başımda bir qəribəlik" adlı romanının təqdimatı mərasimində Los Ancelesdə oxucuları ilə görüşüb.

Axar.az türk mətbuatına istinadən xəbər verir ki, təqdimatdan sonra yazıçı "Los Anceles Tayms"ın tənqidçisi David L.Ulinə müsahibə verib. Pamuk müsahibəsində əsər yazmağın yalnız bir mərhələdən ibarət olmadığını, bəzən eyni hadisəni təkrar-təkrar yazaraq gözlənilməz və maraqlı detallarla oxucusunu həyəcanlandırdığını deyib.

O, "İstanbul yazarı" ifadəsinə isə belə münasibət bildirib: "Digər yazıçılar üçün olduğu kimi mənim üçün də əsas insan faktorudur. Beynəlxalq miqyasda tanınandan sonra "İstanbul yazıçısı" kimi xatırlanmağa başladım. İstanbul 63 il əvvəl, mən doğulanda 1 milyon əhalisi olan bir şəhər idi, mən yazmağa başlayanda əhalisi 3 milyon oldu, indi isə 15-16 milyondur. Və mən şanslıyam ki, bu prosesə şəxsən şahidlik etmişəm".

Pamuk söhbətin sonunda oxucuların suallarını cavablandıraraq kitablarını imzalayıb.