Axar.az-ın "Bir abzas" layihəsində hər hansı ədəbiyyat adamı haqda həmkarlarının fikirlərini təqdim edəcəyik. Layihənin növbəti qonağı xalq yazıçısı Maqsud İbrahimbəyovdur.

Yazıçı Yalçın İslamzadə həmkarı Maqsud İbrahimbəyovun yaradıcılığı haqda bir abzaslıq fikrini bölüşür:

"Maqsud İbrahimbəyovun əsərlərindən daha çox "Kərgədan buynuzu"nu xatırlayıram. Alim qayınatasından kərgədan buynuzu istifadə olunaraq hazırlanan türkəçarənin insanı gənc saxladığını eşidən və əslində, ölümdən qorxan birinin başına gələnlər haqqında komik, hətta satirik bir uzun hekayə idi. Gənc qalma arzusu bizim yazıçılar tərəfindən çox işlənməyib, görünür, qocalıq institutunun mötəbərliyinə görə qocalıqdan daha çox yazıblar, qocalıq isə ölümə yaxın olduğu üçün ölüm əbəbiyyatımızda geniş işlənmiş mövzudur. Ancaq mövzunu daha çox mistifikasiya ediblər, magik elementlərlə zənginləşdiriblər, nəticədə ölüm bir çox əsərdə təbii proses olmaqdan çıxıb, Əzraillə sonu məğlubiyyət olan mübarizə kimi işlənib. İbrahimbəyovun əsərində ölüm mövzusu fərqli işlənmişdi. İndiki zamanda bəlkə də əsər çox komik görünməz, çünki hazırkı dövrdə belə kərgədan buynuzu tipli xurafatlar xortlayıb və komik olmaqdan çıxıb, olduqca ciddiyə alınmağa başlayıb".