Qafqaz İslam Ordusunun komandanı Nuru Paşa üçün 67 il sonra cənazə namazı qılınıb.

Axar.az xəbər verir ki, bu barədə informasiyanı "Odatv.com" saytı yayıb. Sayt cənazə namazının Nuru Paşanın məzar kompleksinin restavrasiya edildikdən sonra təşkil edilən açılış mərasimindən əvvəl qılındığını bildirib.

Məzar kompleksinin açılış mərasiminə Azərbaycan millət vəkili Qənirə Paşayeva, Ənvər Paşanın nəvəsi Arzu Ənvər Əroğan, türkiyəli tarixçi Atilla Oral, iş adamı Zəki Yılmaz qatılıb. Cənazə namazı qılındıqdan sonra Azərbaycandan gətirilən torpaq Nuru Paşanın qəbrinin üzərinə tökülüb.

Qeyd edək ki, Nuru Paşa 1949-cu ildə Kiligil silah fabrikinin müəmmalı şəkildə partlaması nəticəsində həyatını itirib. Onunla birlikdə 28 nəfər həlak olub. Partlayışdan sonra ölənlərin parçaları üç tabuta qoyularaq torpağa tapşırılıb. Maraqlı məqam ondadır ki, bundan 20 gün sonra Nuru Paşanın bədəninin bir hissəsi tapılıb. Onun basdırılması zamanı o dövrün İstanbul müftisi olan Ömər Nasuhi Bilməndən Paşa üçün cənazə namazı qılması istənilib, lakin müfti bunu qəbul etməyib və "bir cəsəd parçası üçün cənazə namazı qılınmaz" fitvasını verib. Bundan sonra Paşa cənazə namazı qılınmadan öz yaxınları tərəfindən torpağa tapşırılıb.