Güney Azərbaycanda fars şovinizminə qarşı keçirilən aksiyalarda həbs edilənlər sırasında şair də var.

Axar.az xəbər verir ki, həbs edilən şair Elşən Böyükvənddir. Onun şeirləri mütəmadi olaraq Azərbaycanın bir sıra mətbuat orqanlarında və "Azadlıq" radiosunun saytında dərc olunub.

Qeyd edək ki, ötən gün İranda Azərbaycan türkləri izdihamlı etiraz aksiyaları keçirib. Aksiya iştirakçıları noyabrın 6-da İranın "Kanal 2" telekanalında yayımlanmış proqramda azərbaycanlıların təhqir edilməsinə etirazlarını bildiriblər. Etirazlar Təbriz, Urmiya, Ərdəbil, Zəncan, Meşkin şəhərlərində və paytaxt Tehranda baş tutub. Polis və təhlükəsizlik qüvvələri aksiyanı dağıtmaq üçün gözyaşardıcı qaz və suvuran maşınlardan istifadə edib. Çoxlu sayda yaralı var. Həbs edilən siyasi fəalların sayı 25 nəfərə çatıb. Bundan başqa bu gün Urmiyada baş tutan aksiyalar zamanı bir nəfər azərbaycanlı həlak olub.