Ermənistanın elektron kütləvi informasiya vasitələri Azərbaycan Silahlı Qüvvələrinin cəbhə xəttində guya təxribat törətməsi və itki verməsi barədə növbəti dəfə yalan məlumat yayıblar.

Bunu Müdafiə Nazirliyinin Mətbuat Xidməti Axar.az-ın sorğusuna cavab olaraq söyləyib. Nazirlik Silahlı Qüvvələrimizin dünən və bu gün ərzində heç bir itki vermədiyini bildirib:

"Düşmən tərəfi ictimaiyyəti çaşdıran və həqiqətə uyğun olmayan bu cür xəbərləri yaymaqla gələcək təxribatları üçün zəmin yaratmaq məqsədi daşıyır. Bildiririk ki, Silahlı Qüvvələrimizin bölmələri heç bir itki verməyib və qoşunların təmas xəttində əməliyyat şəraitinə tam nəzarət edir".

Qeyd edək ki, bu gün Ermənistan mətbuatı Azərbaycan ordusunun iki əsgərinin öldürülməsi haqqında yalan məlumat yayıb.