Millət vəkili Qənirə Paşayevanın Cəlal Bayar Universitetində Qarabağ Mərkəzi təklifi müsbət qarşılanıb.

Axar.az xəbər verir ki, Qənirə Paşayeva Azərbaycanda səfərdə olan Manisa Cəlal Bayar Universitetinin rektoru professor A.Kamal Çələbinin başçılığı ilə universitetin nümayəndə heyəti ilə görüşüb.

Rektor A.Kamal Çələbi Azərbaycana İnşaat və Memarlıq Universitetinin dəvəti ilə gəldiklərini, qardaş ölkə olan Azərbaycan ilə Türkiyə arasında bütün sahələrdə, o cümlədən təhsil sahəsində əlaqələrin getdikcə genişlənməsindən, Azərbaycanla əməkdaşlıqdan böyük məmnunluq duyduğuqlarını deyib.

Qənirə Paşayeva Cəlal Bayar universiteti ilə Azərbaycanın ali təhsil müəssisələri arasında əməkdaşlığın daha da genişlənməsinin, burada təhsil alan azərbaycanlı tələbələrin sayının getdikcə artmasının, artıq 190 nəfər tələbənin burada təhsil almasının müsbət hal olduğunu qeyd edib.

Universitet rektoruna və heyət üzvlərinə Azərbaycanla, Dağlıq Qarabağ münaqişəsi, Xocalı Soyqırımı ilə bağlı geniş məlumatlar verilib və bu istiqamətdə geniş fikir mübadiləsi aparılıb.

Qənirə Paşayeva sözügedən Universitetdə Qarabağ Mərkəzinin açılması təklifi ilə çıxış etdiyini bir daha xatırladaraq bildirib ki, belə bir mərkəzin olması türk kökənli gənclərimiz və burada təhsil alan xarici tələbələrə Qarabağ həqiqətlərinin çatdırılması üçün çox önəmlidir.

Universitet rektoru, professor Kamal Çələbi və nümayəndə heyəti üzvləri təklifi dəstəkləyiblər və yaxın günlərdə bu məsələyə baxılacağını bildiriblər.

Görüş zamanı Azərbaycan-Türkiyə münasibətləri, bölgədə getdikcə gərginləşən vəziyyət barədə də geniş fikir mübadiləsi aparılıb.