Almaniyanın Dağlıq Qarabağ münaqişəsinin həlliylə bağlı 7 maddəlik təkliflər paketinə toxunmaması göstərir ki, Berlin münaqişənin həllindən çox atəşkəsin qorunmasına çalışır.

Axar.az xəbər verir ki, bu haqda politoloq Elxan Şahinoğlu yazıb. Siyasi şərhçi Almaniyanın bölgədə növbəti eskalasiyadan ehtiyatlandığını deyib:

"Rəsmi təkidlə Bakı Vyana və Sankt-Peterburqda təkidlə insidentlərin araşdırılma mexanizminin status-kvonun uzanmasına xidmət etdiyini bildirib".

Politoloq hesab edir ki, Berlinin Dağlıq Qarabağın azərbaycanlı icması ilə erməni icması arasında davamlı görüşlərin keçirilməsinə dair təşəbbüsü Bakının maraqlarına cavab verir:

"Ancaq Dağlıq Qarabağın erməni icması danışıqlara yalnız erməni qoşunları Azərbaycan ərazilərini tərk edikdən sonra qatıla bilər. İrəvan isə hazırda buna mane olur. Bundan başqa, prezidentlərin növbəti dəfə Parisdə görüşməsi ilə bağlı təklif də, Lavrovun iyulun 4-də İrəvana və Bakıya səfəri də daha çox atəşkəsin uzunmüddətli olmasına köklənib".

Qeyd edək ki, ATƏT-in fəaliyyətdə olan sədri, Almaniyanın Xarici İşlər naziri Frank-Valter Ştaynmayer iyunun 30-da Azərbaycanda işgüzar səfərdə olub və Xarici İşlər naziri Elmar Məmmədyarovla görüşüb.