Qəbələdə Tikanlı çayda bir neçə gün əvvəl yaranan sel 10-a yaxın kəndə gedən yolu dağıdıb. Kəndlilər rayon mərkəzinə gəlmək üçün çay üzərindən ağır yük maşınları ilə keçirlər.

Xəzər xəbər-in məlumatına görə, güclü yağışlardan sonra yaranan sel Tikanlı çayının üzərində olan körpünü yuyub aparıb.

Görüntülər Qəbələdəndir. Seldən sonra Tikanlı-Bum yolu baglanıb. Sakinlərin sözlərinə görə alternativ yol 50 km uzundur.

Yük maşını ilə çayı keçmək 1 manatdır. Pul vermək istəməyənlər bu kənd sakini kimi sürətlə axan suyu yalınayaq keçmək məcburiyyətindədir.

Qəbələ rayon İcra Hakimiyyətindən bildirdilər ki, Tikanlı çayının yatağının daha geniş olmasına görə burada böyük körpü salınmalıdır və bu, müvafiq qaydada işlənilərək tikintisi dövlət proqramına salınıb. Proqram əsasında həmin çayın üzərində körpü nəzərdə tutulur.