Üzeyir Hacıbəyli, Xurşidbanu Natəvan və Bülbülün güllələnmiş heykəllərindən ibarət memorial kompleksin yaradılması Mədəniyyət Nazirliyinin qərarından asılı deyil.

Bunu Kult.az-a açıqlamasında millət vəkili Fazil Mustafanın Dənizkənarı bulvarda “Sürgün olunmuş abidələr” adlı memorial kompleks yaradılması barədə təklifinə münasibət bildirən nazirliyin mətbuat katibi İntiqam Hümbətov deyib.

O bildirib ki, belə bir kompleksin yaradılması üçün Nazirlər Kabineti qərar verməlidir:

“Millət vəkili Fazil Mustafanın təklifi müzakirə olunarsa, dəstəklənərsə və belə bir ümumi qərar olarsa, kompleks yaradıla bilər”.

Qeyd edək ki, millət vəkili Fazil Mustafa Dənizkənarı bulvarda “Sürgün olunmuş abidələr” adlı memorial kompleks yaradılmasını təklif edib. O bildirib ki, İncəsənət Muzeyinin həyətində saxlanılan Üzeyir Hacıbəylinin, Xurşidbanu Natəvanın və Bülbülün güllələnmiş heykəlləri erməni barbarlığını sübut etmək üçün bu kompleksdə nümayiş etdirilməlidir.