Azərbaycan ədəbiyyatının ən qədim yazılı abidəsinin VIII əsrdə yaşamış şairə Zibeydə Xatuna aid olması ilə bağlı məlumatlardan xəbərimiz var. Məsələ vaxtilə araşdırılıb.

Bu sözləri Kult.az-a açıqlamasında Məhəmməd Füzuli adına Əlyazmalar İnstitutunun direktoru, akademik Teymur Kərimli deyib.

“Deyilənə görə, Zibeydə xanım Harun ər-Rəşidin (beşinci və ən məşhur Abbasi xəlifəsi) həyat yoldaşı olub. Amma onun əslən azərbaycanlı olması və Azərbaycan dilində yazıb-yaratması barədə yayılan informasiyalar öz təsdiqini tapmayıb. Nə qədər axtarsaq da, Zibeydə Xatunun Hindistanın Bombey şəhərində işıq üzü gördüyü deyilən “Ruzi Revşən” adlı kitabını əldə edə bilmədik”, - o bildirib.

Qeyd edək ki, Zibeydə Xatunun Hindistanın Bombey şəhərində işıq üzü görmüş “Ruzi Revşən” adlı kitabının Azərbaycan ədəbiyyatının ən qədim yazılı abidəsinin olması ilə bağlı iddialar gündəmə gəlib.