Ölkəmizdə növbədənkənar parlament seçkilərinin keçirilməsi gündəmdədir. Artıq bir neçə gündür sosial şəbəkələrdə sənət adamları xalq artisti Afaq Bəşirqızının millət vəkilliyinə namizəd olması ilə bağlı çağırışlar edirlər. Onlar A.Bəşirqızını xalq artisti, millət vəkili Zeynəb Xanlarovanın əvəzinə Milli Məclisdə görmək istədiklərini bildiriblər.

Məsələ ilə bağlı Kult.az-a danışan A.Bəşirqızı hələlik bu barədə danışmaq üçün tez olduğunu deyib:

“Hesab edirəm ki, indi bu söhbətlərin yeri deyil. Kimlər məni dəstəkləyirsə, Milli Məclisdə görmək istəyirsə, onlara təşəkkür edirəm. Düzü, bu barədə bir şey deyə bilmərəm. Hələlik bu haqda düşünməmişəm”.

Qeyd edək ki, bu gün Milli Məclisin plenar iclasında YAP-ı təmsil edən deputatların Milli Məclisin buraxılması ilə bağlı müraciəti müzakirə olunacaq.