Türkiyə futbolunda növbəti maraqlı an yaşanıb.

Axar.az xəbər verir ki, öz meydanında "Osmanlıspor"u qəbul edən "Trabzonspor" komandası Türkiyədə futbol qarşılaşmalarını idarə edən hakimlərə qeyri-adi şəkildə etiraz edib.

"Trabzonspor"un futbolçuları matç başladıqdan sonra 30 saniyə ərzində meydanda hərəkət etməyiblər. "Osmanlıspor"un oyunçuları rəqibin bu addımı qarşısında hücuma keçməyiblər, belə ki, oyunçular öz mövqelərində paslaşıblar.

"Osmanlıspor"un rəqibinin etirazına dəstəyi azarkeşlər tərəfindən də alqışla qarşılanıb.

Qısa etirazdan sonra oyun qarşılıqlı mübarizə şəklində davam edib və "Trabzonspor" nəticədə rəqibinə 2-1 məğlub olub.

Qeyd edək ki, ötən həftə "Qalatasaray" və "Trabzonspor" komandaları arasında baş tutan derbidə tarixi anlar yaşanmışdı. Belə ki, matçın hakimi Salih Dursun "Trabzonspor"un 4 oyunçusuna qırmızı vərəqə göstərmiş, nəticədə də qonaqlar 7 nəfərlə qalmışdı.