Ana səhifə Kult |
Mənim nəinki Kübra Əliyevaya, bütün sənətkarlara hörmətim sonsuz və əbədidir.
Axar.az xəbər verir ki, bu sözləri rəsmi Feysbuk səhifəsində aktrisa Kübra Əliyevanın ölümü ilə bağlı yalan xəbərə inanıb, status yazan Aybəniz Haşımova qeyd edib. Əməkdar artist yanlış məlumatın mənbəyi kimi bu xəbəri yayanları deyil, onun Feysbuk statusunu əsas götürdüyünə görə Axar.az portalını qınayıb:
"Kübra xanımla bağlı statusu hamınızın tanıdığı prodüser Tarix Əliyevin İnstaqram səhifəsində oxumuşdum və bir çox hörmət bəslədiyim sənətkarlar da çox üzüldüklərini şərh bölümündə yazıb bildirmişdilər. Mənim yerimə kim olsaydı, o da üzülərdi və münasibətini bildirərdi. Çox nahaq (bu məlumatı) Axar.az saytı öz həmkarlarına deyil, mənim statusuma istinadən yazıb. Diqqətsizliyi saytlar edə bilər, mən deyil. Bəsdirin reytinq xatirinə insanların ruhu ilə oynadınız. Əsl şounu sizin bəzi həmkarlarınız göstərir, Axar.az saytı, mən deyil. O ki qaldı Kübra xanıma, çox şükür ki, sağdır. Elə edin ki, həmişə sağ qalsın. Yoxsa saytların əlindən biz hamımız qırılmasaq yaxşıdır..."
Redaksiyadan qeyd: Aybəniz Haşımovanın sənəti də, səhnə mədəniyyəti də bizim üçün dəyərlidir. Axar.az olaraq bir yanlışlığın qarşısını almış, A.Haşımovanın sevildiyini, ona görə də izləyicilərinin çox olduğunu və dəyərli əməkdar artistimizə insanların inandıqları üçün bu məlumatın sürətlə paylaşıldığını nəzərə alaraq, məhz onun səhifəsinə istinad etmiş, xəbəri yalnız Kübra Əliyevanın münasibətini öyrəndikdən sonra dərc etmiş, anlaşılmazlığı aradan qaldırmışıq.
Hər iki qiymətli sənətçimizə uzun ömür və yaradıcılıq uğurları arzulayırıq.
Tarix
2016.10.06 / 15:18
|
Müəllif
Dilarə Zamanova
|