Fransız AFP xəbər agentliyi Hələbdə yaşayan 70 yaşlı Məhəmməd Muhiddin Anisin köhnə avtomobillərdən ibarət kolleksiyasını göstərməklə, Suriyada 6 ildir davam edən döyüşün səbəb olduğu insanlıq dramını hüznlü bir insan hekayəsi kimi gözlər önünə gətirib.

Kult.az xəbər verir ki, 1970-ci illərdə İspaniyada tibb təhsili aldıqdan sonra avtomobillərə hədsiz sevgisi olan Anis “Fiat” avtomobil şirkətində tərcüməçi kimi fəaliyyətə başlayır. Bundan sonra o, 30 avtomobildən ibarət kolleksiya yaradır. Lakin sevgi ilə qurulan bu kolleksiya Şam rejiminin bombardmanı zamanı böyük zərər görür. Nəticədə 20 avtomobilini xilas edən Anis hazırda avtomobilləri ilə birlikdə xarabalıqda yaşayır.

Onun həyat tərzi İkinci Dünya müharibəsindən bəhs edən "Pianoçu" filmindəki səhnələrə bənzədilir.

Qeyd edək ki, Londondakı Suriya İnsan Haqları Müşahidə Evi Suriyada 6 ildir davam edən vətəndaş müharibəsi nəticəsində ən azı 465 mindən çox adamın zərər gördüyünü bildirib. Müharibə 321 mindən çox adamın həyatına son qoyub, 145 min adam isə itkin düşüb.