Aprelin 11-dən 25-dək Bakı Dövlət Universitetində çin dili üzrə 14-cü ümumdünya "Çin dili körpüsü" tələbə müsabiqəsinin Azərbaycan üzrə seçmə turu keçiriləcək.

Axar.az xəbər verir ki, müsabiqədə Azərbaycanın müxtəlif ali təhsil müəssisələrində çin dilini öyrənən 200-dən çox tələbə iştirak edəcək. Müsabiqə iki mərhələdən ibarət olacaq. İlk mərhələdə iştirakçılar Çin haqqında bilikləri üzrə yazılı imtahan verəcək. İkinci mərhələdə isə nitq söyləyəcək, sualları cavablandıracaq və bədii çıxış edəcəklər. Birinci mərhələni müvəffəqiyyətlə başa vuran iştirakçılar ikinci mərhələyə keçəcək. İkinci mərhələnin nəticələrinə əsasən, müxtəlif mükafatlar veriləcək. Qaliblər Çində keçiriləcək 14-cü ümumdünya "Çin dili körpüsü" müsabiqəsinin final mərhələsində azərbaycanlı tələbələri təmsil etmək və ya final mərhələni seyr etmək imkanı qazanacaqlar. Müsabiqənin təşkilatçısı olan Konfutsi İnstitutunun qərargahı digər laureatlara ödənişsiz çin dilini öyrənmək imkanı verəcək. Azərbaycanı təmsil edən müsabiqə qalibi Asiya zonasında keçiriləcək müsabiqədə iştirak edəcək.

Qeyd edəki ki, Bakı Dövlət Universitetinin nəzdində Konfutsi İnstitutu 2011-ci ilin aprel ayında yaradılıb.