Kitabevim.az mağazalar şəbəkəsində Türkiyənin məşhur yazıçısı Kahraman Tazeoğlunun imza mərasimi keçirilib.

Axar.az xəbər verir ki, tədbiri giriş sözü ilə Kitabevim.az-ın meneceri Xəyalə Nəsirli açıb. O, Kahraman Tazeoğlu haqqında tədbir iştirakçılarına məlumat verib.

Daha sonra "Hədəf" Nəşrlərinin direktoru Şəmil Sadiq çıxış edib:

"İlk öncə Kahraman Tazeoğluna xoşgəldin deyirəm. Bizim dəvətimizi qəbul edib, gəldiyiniz üçün sizə təşəkkür edirik. Keçən il Elxan Yurdoğlu ilə söhbət edirdik. Onda Elxan bəy dedi ki, türkiyəli yazıçı Kahraman Tazeoğlunun kitablarını Nərgiz İsmayılova ilə birlikdə Azərbaycan dilinə uyğunlaşdırmışıq, istərdik ki, sizin nəşriyyatda çap edək. Onda mən Elxan bəylə razılaşdım. Daha sonra Emin müəllim bildirdi ki, Kahraman Tazeoğlunu Azərbaycana dəvət etmişik. Bu işdə gənc oxucu Tamerlan bəyin də xüsusi rolunu vurğulamaq istərdim. "Hədəf" Nəşrləri Azərbaycan Türkiyə arasında mədəni əlaqələrin inkişafı üçün həmişə səy göstərir. Mart ayında Kitabevim.az-ın bir yaşı tamam oldu. Bu bir il ərzində oxucularla yazıçıların görüşünü keçirməyə çalışdıq. Qarşıda sizi çox böyük sürprizlər gözləyir".

Sonra Kahraman Tazeoğlu çıxış edərək oxucuları salamlayıb:

"Məni oxucularımla görüşdürdüyünüzə görə sizlərə təşəkkür edirəm. Kitabı tərcümə edən dostlara da çəkdikləri əziyyətlərə görə minnətdarlığımı bildirirəm. İlk dəfə başqa dilə tərcümə olundum. Daha doğrusu uyğunlaşdırıldım. Bakıda olduğum üçün sevincliyəm. Azərbaycanda çox oxucum olduğunu bilirəm. Sizinlə birlikdə olmaq çox xoşdur".

Daha sonra Kahraman Tazeoğlu oxucuların suallarını cavablandırıb.

Hazırda Kahraman Tazeoğlunun Şeir Gecəsi keçirilir.