Cənubi Asiyanın neft kralı Bruney sultanı Bolkiah kiçik oğlu Əbdül Maliki "Min bir gecə" nağıllarındakı kimi möhtəşəm toyla evləndirib.

Axar.az xəbər verir ki, taxtın iki nömrəli varisi 31 yaşlı şahzadə 22 yaşlı Dayanqku Raabiatul Adaviyyah Penqiran Haji Bolkiah ilə 11 gün 11 gecə davam edəcək toyla dünya evinə girir.

Cənubi Asiya ölkəsinin paytaxtı Bandar Beqavandakı 1788 otaqlı sarayda baş tutan toyun ehtişamı göz qamaşdırıb. Gəlin və kürəkən qızıl taxta oturub, gəlinə taxılan yumurta böyüklüyündə zümrüd daşlarla bəzəkli boyunbağı, brilyant və qiymətli daşlarla bəzəkli tac diqqət çəkib.

Sahəsi İstanbuldan da kiçik olan ada ölkəsi Bruneyi 1968-ci ildən bu yana idarə edən Hassanal Bolkiahın 40 milyard dollar sərvəti, 3 arvadı, 5 oğlu, 7 qızı var. Şahzadə Malik Sultanın altıncı övladıdır, anası isə kralın ilk həyat yoldaşıdır.