Alman yazıçısı, Nobel mükafatı sahibi Günter Qrass bu ilin aprel ayında, 88 yaşında dünyasını dəyişəndən sonra yazıçının çap olunmayan gündəlikləri ortaya çıxıb. "Bu, hələ hamısı deyil", – yazıçının ev muzeyinin direktoru deyib.

Axar.az xəbər verir ki, tapılan gündəliklərin yazılma tarixi 1955-ci ilə təsadüf edir. Bu, Qrassın Berlindən Lyubekə qayıtdığı dönəmdir.

Qrassın gündəlikləri yazıçının diktəsi ilə katibəsi tərəfindən yazıya alınıb. Muzey direktorunun sözlərinə görə, yazıçı sözügedən mətnləri dərc etməyi planlaşdırırmış. Amma çap olunma tarixi yazıçının vəsiyyətində yer almayıb.

Qeyd edək ki, Günter Qrass 1959-cu ildə "Tənəkə təbil" əsəri ilə bütün dünya ədəbiyyatında məşhurluq qazanıb və 1999-cu ildə Nobel mükafatına layiq görülüb.