Ana səhifə Kult |
Yaxın günlərdə tamaşaçılar daha bir yerli film təqdim olunacaq. "Şeytanın tərəfində" adlı qorxu filmi Şəkidə yerləşən "REC FİLM" studiyasında çəkilir.
Filmin ssenaristi və rejissoru olan Rəvan REC Axar.az-a açıqlama verərək çəkdiyi filmin əslində qeyri-adi film olmadığını düşünmür:
"Studiyamız indiyə qədər istər çəkilən çarxlar olsun, istər reklam filmləri, istər qısa filmlər insanları heyrətləndirməyi bacarıb. Əslində son illər müasir kinoteatrların istifadəyə verilməsi böyük kino barədə ciddi-ciddi düşünməyimizə gətirib çıxardı. Fikirləşirdik ki, Azərbaycan tamaşaçısı komediyalarla yanaşı, həm də yerli qorxu filmlərinə acdır. "Şeytanın tərəfində"nin ilk kadrları artıq lentə alınıb. Çəkilişlərin Şəkidə aparıldığı filmin "teaser"ində rol alan aktyorlar da azərbaycanlılardır. Bu, inanılmaz görünən kadrlar Azərbaycanda əlçatan texniki vasitələrlə ərsəyə gətirilib. Baxmayaraq ki, film bildiyiniz "Azərbaycan filmləri"ndən deyil".
Filmin yaradıcıları deyirlər ki, əsas istəkləri azərbaycanlıları bu ölkədə heç də Qərb istehsalı filmlərdən geri qalmayacaq ekran əsəri yaratmağın mümkünlüyünə inandırmaqdır. Bir çox yerli məşhur aktyorların da cəlb edildiyi "Şeytanın tərəfində"nin süjet xəttinə gəlincə ssenarist filmdə hadisələrin real hadisələrə söykəndiyini bildirib.
Qeyd edək ki, "Şeytanın tərəfində" qorxu filminin gələn ilin əvvəlinə qədər bəyaz pərdəyə çıxacağı nəzərdə tutulub.
Tarix
2015.04.29 / 19:46
|
Müəllif
Nilufər Muğantürk
|