"Mənim düşüncəmdə "xaltura" anlayışı yoxdur".

Bu sözləri rəssam Yusif Mirzə Axar.az-a açıqlamasında deyib:

"Mən rəsm əsərlərimin satışı ilə məşğul olmuram. Bu, yaradıcılıqdan daha çox kommersiya-biznes sahəsidir. Bununla qalereyalar məşğul olur. Mədəniyyət Nazirliyinin təşkil elədiyi sərgilərdə iştirak etmişəm. Həmin sərgilərdə rəsmlərim Azərbaycan Dövlət Rəsmlər Qalereyası üçün alınıb. İndi sərgilər, layihələr çox azalıb. Bu da başa düşüləndir. Çox səbəb var. Bunları mən deməsəm də, bilirsiniz. Arzu edək ki, Avropa oyunları ölkəmizdə yüksək səviyyədə keçsin və bu ölkəmizin imicinin yüksəlməsinə xidmət etsin. Bunun hər kəsə faydası olacaq, o cümlədən, yaradıcı insanlara. Deməzdim ki, rəsm əsərlərinə ancaq xaricilər maraq göstərir. Ətrafımızda ədəbiyyata, sənətə, musiqiyə, rəssamlığa marağı olan zövqlü, səviyyəli, mədəni insanlar tanıyıram. Onlar sənəti sevir və qiymətləndirirlər. Bu "xaltura" sözünü Bədii Fondun vaxtında sifarişlərə deyirdilər. İndi nəyə dediklərini bilmirəm. Mənim düşüncəmdə "xaltura" anlayışı yoxdur".

Xatırladaq ki, bir neçə gün əvvəl rəsm əsərlərinin satılması ilə bağlı Axar.az-ın keçirdiyi sorğuda Fərhad Yalquzaq, "Əslində, rəssamlarımızın çoxu özünü təmin etmək üçün əsil yaradıcılıqdan uzaqlaşıb "xaltura" ilə məşğul olur", – demişdi.