Özbəkistandakı Heydər Əliyev adına Azərbaycan Mədəniyyət Mərkəzinin könüllüləri Vikipediyanın özbək dil bölməsində tarixi Xudafərin körpüsü və Prezident İlham Əliyevin abidənin ziyarətinə dair məqalə yaradıblar.

Kult.az xəbər verir ki, bu barədə “Vikipediya” üzrə mütəxəssis, diaspor üzrə araşdırmaçı-ekspert Elnur Eltürk bildirib.

Bölmədə qeyd olunur ki, 23 avqust 1993-cü il tarixində Cəbrayıl rayonunun Ermənistan ordusu tərəfindən işğalı nəticəsində tarixi abidə Xudafərin körpüsü Ermənistan ordusunun nəzarətinə keçib, 4 oktyabr 2020-ci ildə Azərbaycan ordusunun əks-hücumu nəticəsində rayon və Xudafərin körpüsü işğaldan azad edilib.

Unikal abidə olan körpüdə Azərbaycan memarlıq məktəbinin üslubunun öz əksini tapdığı qeyd olunan məqalədə vurğulanır ki, Araz çayı üzərində çoxlu körpülər salınsa da, onlardan ən əhəmiyyətlisi Xudafərindir.

Bununla yanaşı, məqalədə Xudafərin körpüsünün tarixinə də nəzər salınıb.