Bu gün Kəlbəcər rayonu 27 illik işğaldan sonra Azərbaycan Ordusunun nəzarəti altına keçib.

Kult.az mövzu ilə bağlı kəlbəcərli məşhurların fikirlərini təqdim edir:

Muğam ifaçısı Babək Niftəliyev:

Bu dəqiqə Murov dağından aşağı endim, dünəndən buradayam. Hərbi maşınlarımız doğma Kəlbəcərimə doğru irəliləyir. Sevincimin həddi-hüdudu yoxdur. Buna görə azərbaycanlı, qarabağlı olaraq Ali Baş Komandanımıza, Müzəffər Ordumuza təşəkkür edirəm. Şəhid qardaşlarımızı heç vaxt unutmayacam, unutdurmağa qoymayacam. Onların qanı bahasına Qələbə görürük.

Doğma ata-baba yurduma qayıdan kimi nə edəcəyimi bilmirəm, təki o torpaqlara addım atmaq qismət olsun.

Parlament Jurnalistləri Birliyinin sədri Elşad Eyvazlı:

Bu gün hisslərimi sözlərlə təsvir edə bilmirəm. Çox xoşbəxtəm! Sanki yenidən doğulduğumu anlayıram, amma uşaq deyiləm, gözümün qabağında yenidən doğuldum. Kəlbəcərdən köçəndə əsgər idim. Məncə, insanın ən çox yadında qalan müharibə dostlarıdır, buna görə də mənim ilk gedəcəyim yer oradakı əsgər postları olacaq. Oranı ziyarət edib, o günlərimi yada salmaq istərdim.