09:56

Qərbi Azərbaycan ərazisində 395 məscidimiz mövcud olub. Eyni zamanda İrəvan şəhərinin özündə və ətraflarında 36 məscidimiz fəaliyyət göstərib. Lakin son 100–150 il ərzində bu məscidlər tamamilə sıradan çıxarılıb və yaxud quruluşu dəyişdirilərək kilsə kimi istifadə olunub. Buna nümunə olaraq Mehri şəhərindəki məscidimizi göstərmək olar.

Bu sözləri Kult.az-a açıqlamasında İşğal olunmuş ərazilərindəki tarix və mədəniyyət abidələrini müdafiə təşkilatı İB-nin sədri Faiq İsmayılov deyib.

“Açığı, bu məscidlərin yenidən həyata qaytarılmasına ümid etmirəm. Çünki Ermənistanda birbaşa azərbaycanlılar, türklər əleyhinə düşmənçilik mövqeyi sərgilənir və hətta bir sıra təxribatlar da törədilir. Qərbi Azərbaycan ərazisində yerləşən Göy Məscidin bərpası isə İranın Mədəni İrs və Turizm İdarəsi tərəfindən aparılıb. Sonralar ermənilər bu abidəni fars məscidi kimi təqdim edib. Ümumiyyətlə, abidələrimiz çox acınacaqlı vəziyyətdədir, bəzilərinin yeri belə bilinmir”, - o bildirib.

Azərbaycan Tarixçiləri İctimai Birliyinin sədri Mehri Xanbabayeva isə qeyd edib ki, Azərbaycana aid abidələr və məscidlər bərpa olunub öz tarixi vəziyyətinə qaytarılmalıdır:

“Ermənilərin törətdiyi təxribat və saxtakarlıqlar dünyaya sübut olunmalıdır”.