Dünən Çinin Yantay şəhərində keçirilən "Dünya Qurmanlarının Mətbəx Kitabı Mükafatı" müsabiqəsində "Azərbaycan Mətbəxi" kulinariya kitabı "Ən yaxşı Şərqi Avropa mətbəx kitabı" nominasiyasında qalib gələrək 1-ci yer tutub.

Axar.az xəbər verir ki, tədbirdə Azərbaycan tərəfini kitabın müəllifləri Tahir Əmiraslanov və Leyla Rəhmanova təmsil edib.

Kitab Azərbaycanın milli mətbəxinin və kulinariya ənənələrinin beynəlxalq səviyyədə təqdim və təbliğ edilməsi məqsədilə Mədəniyyət və Turizm Nazirliyinin sifarişi ilə 2014-cü ildə Böyük Britaniyanın "Saqi Kitabları" nəşriyyatı tərəfindən nəşr olub və beynəlxalq səviyyədə keçirilən "Dünya Qurmanlarının Mətbəx Kitabı Mükafatı" müsabiqəsi çərçivəsində bir neçə mərhələni adlayaraq final mərhələsinə keçib.

Dünyanın 125 ölkəsindən yüzlərcə nominantın və minlərcə kitabın iştirak etdiyi müsabiqədə "Azərbaycan Mətbəxi" kulinariya kitabı ilə yanaşı, Azərbaycan mətbəxindən bəhs edən daha 3 kitab qalib olub.