Fransa kinematoqrafiyasının canlı əfsanələrindən olan Jerar Depardye qonaq olduğu radio verilişində maraqlı fikirlər səsləndirib.

Axar.az xarici mətbuata istinadən xəbər verir ki, Fransa hökumətinin "vergidən yayınmaq üçün başqa ölkələrdə yaşayır" deməsindən sonra Vladimir Putinin təklifini qəbul edərək Rusiya vətəndaşlığı alan Jerar Depardye həyatı boyu çəkildiyi 181 filmdən yalnız 15-i ilə qürur duyduğunu açıqlayıb. O, Fransa hökuməti haqda da sərt fikirlər səsləndirib:

"Fransız siyasətçilərini başa düşə bilmirəm. Açığı, onları heç sevmirəm. Elə buna görə də dilini bilmədiyim bir ölkədə – Rusiyada yaşayıram".

Özündən bəhs edən aktyor həmişə səmimi olmadığını, həyat qanunlarını tez-tez pozduğunu deyib: "Bu fikrimə görə çoxlarının məndən zəhləsi gedə bilər, amma mən heç vaxt insanların hamısının sevgisini qazanmağı istəməmişəm".

Mətbuatın onu əyyaş adlandırmasına şərh verən Depardye heç də həmişə içmədiyini bildirib:

"Məni Fransanın ən məşhur alkoqoliklərindən biri kimi qələmə versələr də, bu, belə deyil. Tez-tez içmirəm. Mən yaşamaq üçün içən və yaşamın alkoqolik etdiyi biriyəm. Deməli, o qədər də günahkar sayılmıram".