Amerikalı məşhur aktyor və rejissor Con Malkoviç Türkiyədə müxalif mövqeyinə və Gəzi hadisələrində iştirakına görə teatrdan uzaqlaşdırılan aktyor Ləvənt Üzümçüyə dəstək videosu göndərib.

Axar.az xəbər verir ki, İstanbul Şəhər Teatrından uzaqlaşdırılan aktyor C.Malkoviçin çəkdiyi dəstək videosunu Tvitterdəki rəsmi hesabından paylaşaraq dəstək üçün təşəkkürünü bildirib.

C.Malkoviç dəstək mesajında bunları deyib:

"Salam, Ləvənt. Məltəm sənin üçün yaşadığın sıxıntılı vəziyyətlə bağlı video çəkib göndərib-göndərməyəcəyimi soruşdu. Daha yaxşı gələcəyə ümid edə bilərik. Özünə çox yaxşı bax, sənə Nyu Yorkdan sevgilərimi və xoş arzularımı göndərirəm".

Xatırladaq ki, bir neçə gün bundan əvvəl Türkiyənin 10-cu prezidenti Əhməd Necdət Sezər də Ləvənt Üzümçüyə zəng vuraraq ailəsi ilə birlikdə onun yanında olduğunu söyləyib.