Abdulla Şaiq adına Azərbaycan Dövlət Kukla Teatrında rus uşaq yazıçısı Vladimir İlyuxovun fransız yazıçısı Şarl Perronun "Yatmış gözəl" nağılından bəhrələnərək qələmə aldığı ikihissəli "Oyaq gözəl" pyesi əsasında tamaşa hazırlanır.

Axar.az xəbər verir ki, rejissor Anar Məmmədovun quruluşunda hazırlanan səhnə əsərində əsas məqsəd uşaqlara dostluq, qəhrəmanlıq, qorxmazlıq, haqsızlığa qarşı mübarizə, çeviklik və məqsədyönlülük kimi keyfiyyətləri aşılamaqdır.

Komik elementlərlə zəngin, canlı plan və kukla oyunu vəhdətində təqdim ediləcək nağıl-tamaşa müasir üslubda hazırlandığından burada uşaqların sevdiyi müasir nağıl qəhrəmanlarının sintezinə rast gəlmək olur.

Tamaşanın bəstəkarı əməkdar incəsənət xadimi Cahangir Zülfüqarov, rəssamı Əfşan Əsədovadır. Tamaşada əsas rolları Cəmilə Allahverdiyeva, Rəhilə İbadova, Elnarə Hacıyeva, Elnur Xəlilov, Cavid Telman və Araz Həsənov canlandıracaq.

"Oyaq gözəl" tamaşasının premyerası noyabrın sonuncu həftəsində baş tutacaq.