Bu ay İsrailin Netanya şəhərindəki mədəniyyət evində SSRİ xalq artisti, Dövlət Mükafatları laureatı Rəşid Behbudovun anadan olmasının 100 illiyinə həsr edilmiş təntənəli tədbir keçiriləcək.

Axar.az xəbər verir ki, "Odlar yurdu" İsrail-Azərbaycan teatr truppasının bədii rəhbəri Səadət Şükürova tədbirlə bağlı danışarkən Rəşid Behbudovun dünyada Azərbaycanın brendi olduğunu bildirib:

"Rəşid Behbudov Bolqarıstanda, Macarıstanda, İtaliyada, Hindistanda, Çində, Suriyada, Türkiyədə, Misirdə, İordaniyada, İranda, İraqda, Finlandiyada, Polşada və Latın Amerikası ölkələrində qastrol səfərlərində olub. Bütün bu ölkələrdə Rəşid Behbudov konsertlərini "Azərbaycan" mahnısı ilə başlayır və bu mahnı ilə başa çatdırırdı. Bu böyük Azərbaycan müğənnisi bənzərsiz və əlçatmaz sənətkar kimi yaşadı. Həqiqi artistizm, lirizm, Tanrı vergisi olan Rəşid Behbudovun tayı-bərabəri yox idi. Rəşid Behbudov şöhrətin zirvəsində ikən qəflətən və gözlənilmədən dünyasını dəyişdi, onu sevənlərin qəlbində əsl vətənpərvər kimi qaldı".

Xatırladaq ki, bu il dekabrın 14-də ölməz sənətkar Rəşid Behbudovun 100 yaşı tamam olacaq.