13-cü Beynəlxalq Uşaq Muğam Festivalından qələbə ilə ayrılırıq. Tələbəm Sağlar Purmöhsini 2-ci yer, Möhsün Kərimi isə həvəsləndirici diplomla təltif olundu.

Bu sözləri Kult.az-a güneyli xanəndə Məcid Əsri Bakıda keçirilən Uşaq Muğam Festivalının nəticələri haqqında danışarkən deyib.

O bildirib ki, müsabiqə iştirakçıları güclü rəqiblər idi:

“Sağlar “Osmani”, Möhsün isə “Heyratı” muğamını ifa etdi. Müsabiqə yüksək səviyyədə keçirildi. Tarzən Ağasəlim Abdullayevin sədrliyi ilə 7 ölkədən olan münsiflər heyəti iştirakçıların ifasını qiymətləndirdi. Nəticələrdən çox şadıq, uşaqlar sevinirlər. Müsabiqədən razı qaldıq. Şəraitimiz də əla idi. İsti qarşılanma və obyektiv yarışma - bir sözlə, hər şey gözəl təşkil olulnmuşdu”.

Məcid Əsri qələbə qazanan digər yarış istirakçıları haqqında da danışıb:

“Qran-prini Azərbaycan Respublikasından olan iştirakçı qazandı. Birinci yer Türkmənistan və Türkiyə, ikinci yeri biz və Özbəkistan tutduq. Üçüncü qalib isə Qırğızıstan və Özbəkistandan olan ifaçılar idi”.