Mən bu yaxında Azərbaycandan qastrol səfərindən qayıtdım. İlahi, Bakı Las Veqasdır, ikinci Parisdir! Ölkə çox inkişaf edib! Eskalatorsuz yeraltı keçid yoxdur. Bizim Moskvada, Peterburqda və başqa şəhərlərdə qarlı havalarda qocalar və əlillər böyük problemlər yaşayır, yıxılır, əzilirlər. Bakıda isə belə deyil. Bütün eskalatorlar çalışır və siz istədiyiniz kimi çıxıb-düşə bilərsiniz.

Axar.az xəbər verir ki, bu sözləri Sovet və Gürcüstan aktyoru, SSRİ xalq artisti Oleq Basilaşvili Sobesednik-ə danışarkən deyib.

Azərbaycanla Rusiyanı müqayisə edən aktyor gələcəkdə Rusiya Federasiyasının SSRİ-i tarixini yaşayacağını qeyd edib. Onun sözlərinə görə, Rusiya tədricən dağılacaq:

"Prezidentin federal məclisə kiçik biznesin müdafiəsinin zəruriliyi barədə müraciəti və tələbi yerinə yetirilmir. Deməli, prezidentin sözləri heç kim üçün önəm daşımır. Bu, onu göstərir ki, hakimiyyət kifayət qədər güclü deyil. Rusiyada kiçik bizneslər planlı və sistemli şəkildə çökdürülür. Ölkədə belə hal nə vaxt müşahidə edilib? Bütün bunlar sonda büdcə kəsirlərinə və ölkə iqtisadiyyatının çökməsinə səbəb olacaq – SSRİ-də olduğu kimi".