Birgə layihə əsasında ərsəyə gətirəcəyimiz ilk film "Dar küçələr" adlanır. Çəkilişlərə mart ayında start veriləcək.

Kult.az xəbər verir ki, bu sözləri DEVİN media şirkətinin təsisçisi Attila Ulusal Akademik Milli Dram Teatrında keçirilən mətbuat konfrasında jurnalistlərin suallarını cavablandırarkən deyib.

"Bu, aktyorluğu öyrənən azərbaycanlı tələbələrin formalaşması məqsədilə ərsəyə gətirdiyimiz layihədir. Çəkilişlər Azərbaycanda yerli aktyorlarla olacaq. Bunu bir ailə hekayəsi adlandıra bilərik", - o əlavə edib.

Şirkətin baş koordinatoru Rəcəb Katı isə bildirib ki, hazırda əsas məqsəd azərbaycanlı tələbə-aktyorları yetişdirməkdir:

“Bəhs etdiyimiz layihələr sadəcə bir serial deyil. Ona görə də əsla səhv etmək istəmirik. Lazımi qədər təcrübə əldə etdikdən sonra Azərbaycan həqiqətlərini buranın öz vətəndaşları ilə dünyaya eşitdirmək istəyirik. Türkiyədən aktyor da gətirə bilərik, amma layihələrimizi ön plana çıxaranda onların rolu ilə buna nail olmaq istəmirik. Gələcəkdə ehtiyac olarsa, Türkiyənin məşhur simalarına müraciət edəcəyik”.

Şirkət nümayəndələri əsas serial layihəsinin çəkilişlərinə iyun ayında başlayacaqlarını bildirdilər.