İran televizyasının birinci kanalında müsəlmanların birinci xəlifəsi Əbu Bəkrin (Əbu Bəkr əs-Siddiq Abdullah ibn Əbu Quhafə Osman ibn Amir əl-Qüreyşi ət-Teymi) təhqir olunması ölkədə yaşayan sünni məzhəbli müsəlmanların etirazları ilə qarşılaşıb.

Kult.az xəbər verir ki, bu barədə Bəluc Fəallarının Kampaniyası məlumat yayıb.

Məlumata görə, Əbu Bəkr aprelin 23-ü axşam saatlarında “Simaye xanevade” (Ailənin simasi) adlı verilişdə təhqir olunub, onun islam dünyasına mənsubluğu şübhə altına alınıb.

Bundan sonra sünni məzhəbli din xadimləri sosial media platformalarında paylaşım edərək, dövlət televizyasını müsəlmanlar arasında nifaq salmaqda günahlandırıblar.

Etiraz paylaşımları və bəyanatlarının artmasından sonra dövlət televizyası bəyanat yayaraq, hadisəni “bağışlanılmaz və şübhəli” adlandırıb, sünnilərdən üzr istəyib və televiziyanın bölmə rəisi və aparıcının işdən çıxarıldığını elan edib.

Dövlət televizyası bununla yanaşı verilişin bütün platformalardan silindiyini, verilişin hazırlanması və yayılmasında əməyi olan daha 8 nəfərin məhkəməyə verildiyini və barələrində cinayət işi açıldığını bildirib.