Neftçaladan gələn bir xəbər məni sarsıtdı. Adaşım Sabir Abuzər ölümü təsəvvür edilməyən, dünyaya hər gün gəlməyən dəyərli insanlardan biri idi. Bəlkə də “ölümün mənə gücü çatmaz” düşüncəsiylə özü ölümə gedib, faciəli şəkildə həlak olub.

Kult.az xəbər verir ki, bu sözləri xalq şairi Sabir Rüstəmxanlı Sabir Abuzərin intihar etməsi ilə bağlı qeyd edib.

“Vətən sevdalısı, türk-Turan aşiqi, qədim tariximizin kamil bilicisi və araşdırmaçısı idi. Bu yaxınlarda bu araşdırmaların sonucusunu və mənim də həvəslə ön söz yazdığım “Turan” adlı kitabını nəşr etdirmişdi. Əqidəli bir müsavatçı idi. Neftçalaya hər gedişimdə görüşürdük. Ağ saçları və gülər üzü ilə çevrəsinin işığını artırırdı.

Sonuncu dəfə dostlarının iştirakı ilə, yığcam bir məclisdə kitabının təqdimatını keçirmişdik.

Əziz Sabir müəllimin ölümü Neftçalanın ziyalı mühiti, dostları, sevənləri, yaxınları, ailə üzvləri üçün ağır itkidir. Hamısına dərin hüznlə başsağlığı verirəm. İndi Tanrı hüzurunda olan ruhu şad olsun!” – S.Rüstəmxanlı bildirib.