İyunun 18-i Beynəlxalq Mətbuat Mərkəzində (BMM) həkim-yazarların ilk poetik toplusunun 1-ci cildi olan "Həkimlərin söz dünyası" kitabının təqdimat mərasimi keçirilib.

Axar.az xəbər verir ki, şair Əfrahim Hüseynlinin tərtib etdiyi bu kitabda Azərbaycanın klassik yazarlarından tutmuş çağdaş yazarlara kimi qələm sahibləri yer alıb. Təqdimatı açan xanım şairə Hacı Azadə-Taleh Abbasqızı ilk sözü kitabın tərtibatçısı və redaktoru Əfrahim Hüseynliyə verib. Redaktor kitabın yaranması səbəblərini ətraflı izah etdikdən sonra ədəbiyyatımıza gözəl bir töhfə olacağına əminliyini bildirib.

Daha sonra millət vəkili, professor, şair Musa Urud kitabın ön söz müəllifi, filologiya üzrə fəlsəfə doktoru Bilal Alarlı kitab haqda fikirlərini bölüşüb.

Həkim-şairlərdən Ramiz Duyğun, Ramiz Mövsüm, Tofiq Nurəli, Fəxrəddin Ziya, Məmmədyar Məmmədyarlı, Şahin Musaoğlu, Mehin Şıxlinski, Nazilə Gültac, Qalib Şəfahət, Habil Vəliyev, Pərvin Abbaslı tədbir zamanı şerlərini səsləndiriblər.

Tədbirdə dünyasını dəyişmiş alim, isdedalı yazıçılarımız Sərdar Kərimli və Yusif Əhmədovun övladları Rəşad Kərimli, Qüsiyyə Yusif də çıxış edərək bu işdə əməyi olan hər kəsə öz minnətdarlıqlarını bildirdilər.