Kult.az son günlər sosial şəbəkələrdə böyük müzakirələrə səbəb olan mərsiyəxan Seyid Taleh Boradigahi ilə müsahibəni təqdim edir:

– Yeni işiniz olduqca uğurlu və maraqlı alınıb. Lakin səhv etmirəmsə, siz orda farsca da oxumusunuz. Nəyə görə?

– Bu gün bütün qəzəllərimiz fars və ərəb sözləri ilə doludur. Füzulilər, Nəsimilər farsca da yazıblar. Xanəndələrimizin oxuduğu mahnılar da ərəb və fars sözləri ilə zəngindir. Klipdə oxuduğum əsərin sözlərini yazan iranlı şairdir.

– Son layihəniz çoxlarında narazılıq yaratdı. Və bu sizin ilk qalmaqalınız deyil. Bir neçə ay öncə Hacı Şahinin ağladığı və sizin mərsiyə dediyiniz video da müzakirələrə yol açmışdı. Əksəriyyətin bu işinizi bəyənməməsini nə ilə əlaqələndirirsiniz? İnsanlar yenilikdənmi qorxur?

– Çünki xidmətlərim getdikcə daha da yüksəkliyə doğru gedir. Bu da bəzilərini narahat edir.

– Etirazını bildirənlər daha çox dindarlardırmı?

– Dindar da var, dindar olmayan da. Hamısı əzizim, bacım, qardaşımdır. Etiraz edə, bəyənməyə bilərlər. Buna tam haqları var. Lakin söyüş və təhqir yazmaqla öz axirətləri üçün problem yaradırlar.

– Violonçel ifaçısı Mark Zençenko ətrafında gedən qalmaqalla bağlı nə deyə bilərsiniz? Din multikulturalizmi rədd edirmi?

– Dinimiz xristiana da, ümumiyyətlə, hər kəsə mərhəmətlə baxır. Peyğəmbərimiz aləmlərə rəhmət olaraq göndərilib. Orkestrda xristianın yer alması qəbahət deyil. O da insanlıqda bizlə qardaşdır. Və bu iş səbəb oldu ki, o da imam Hüseyni, peyğəmbəri və uca Allahı daha yaxından tanısın.

– Feysbuk səhifənizdə sizə təhqir yazanlara xəbərdarlıq qeydi yazmışınız. Bundan sonra bir yumşama müşahidə olundumu? Polisə şikayət edib ciddi tədbir görəcəyinizə qərar verdiyiniz şəxslər varmı?

– Təhqir yazanlar həddindən artıq çoxdur. Onları da qınamıram, bekardırlar, başlarını qatmaq üçün bilmirlər nə etsinlər. Allah onları bağışlasın. Minlərlə gələn təhqirin heç birinə cavab yazmamışam. Allaha tapşırmışam, vəssalam.