Ötən gün baş verən zəlzələ Şamaxıda bu vaxta qədər bilinən və böyük faciələrə səbəb olan yeraltı təkanları diqqət mərkəzinə daşıyıb. Şamaxı şəhərində tarix boyu müxtəlif dağıdıcı zəlzələlər baş verib və bu hadisələr zamanı minlərlə, bəzən on minlərlə insan həyatını itirib. Bununla yanaşı sözügedən zəlzələlər minlərlə evin, onlarla tarixi abidənin dağılmasına səbəb olub.

Kult.az Şamaxıda baş vermiş ən dəhşətli zəlzələlərin siyahısını təqdim edir:

1. 1667-cil ildə Şamaxıda baş vermiş 6.9 bal gücündə zəlzələ nəticəsində 80 min insan həlak olub. Həmin zəlzələ Azərbaycan tarixinə ən dəhşətli zəlzələ kimi düşüb.

2. Bundan iki il sonra - 1669-cu ildə qeydə alınan zəlzələ isə 5.7 bal gücündə olub və 7 min insanın həyatına son qoyub.

3. Şamaxıda növbəti güclü zəlzələ 1828-ci ildə qeydə alınıb. 5.7 bal gücündə olan zəlzələ zamanı neçə nəfərin həlak olması haqda məlumat yoxdur.

4. Şəhərdə növbəti güclü zəlzələ 1859-cu ildə, 5.9 bal gücündə olub. Hadisə nəticəsində 100 nəfər həlak olub, Şamaxı şəhəri tamamilə dağılıb. Buna görə də Şamaxı quberniyasının mərkəzi Bakıya köçürülüb.

5. 1872-ci ildə baş vermiş 5.7 bal gücündə zəlzələdən sonra şəhərdə ciddi dağıntılar yaşanıb.

6. 1902-ci ildə Şamaxı 6.9 ballıq zəlzələ ilə silkələnib. Olay zamanı 2 min insan həlak olub, minlərlə insan yaralanıb, 20 minə yaxın insan evsiz-eşiksiz qalıb, 4 min yaşayış evi, 8 qədim məscid, 10-dan artıq mədrəsə, 40 qədim şərq hamamı yerlə-yeksan olub.

Xatırladaq ki, ötən gün Azərbaycanın müxtəlif şəhər və rayonlarında, eləcə də Şamaxıda zəlzələ baş verib. Yeraltı təkanlar zamanı dağıntılar olsa da, insan tələfatı qeydə alınmayıb.