"Biz və Onlar" layihəsində: azərbaycanlı, türk, alman

"Biz və onlar" müxtəlif millətlərin mədəniyyətini, dünyagörüşünü, mentalitet fərqlərini ortaya qoyan layihədir. Bu layihədə üç müxtəlif ölkənin nümayəndəsinə eyni sualları ünvanlamaqla onların mədəniyyəti və tarixi ilə bağlı oxşar və fərqli cəhətləri öyrənmiş oluruq.

Budəfəki qonaqlarımız:

Əhməd Adar – 31 yaş, Bakı Dövlət Universiteti, Türkiyə.

Kənan Şamilov – 25 yaş, Əmək və Sosial münasibətlər Akademiyası, Azərbaycan.

Niko Heymel – 27 yaş, Leypsiq Universiteti, Almaniya.

– Ölkənizdə hansı beynəlxalq idman turniri və ya mədəni tədbir keçirilib və bunlar sizin ölkənizin imicinə, insanlarına necə təsir göstərib?

Əhməd Adar: - Turnirlərin ölkə imicinə təsiri, ümumiyyətlə, pozitiv olur. Ona görə ki, insanların Türkiyə ilə bağlı olan təsəvvür və düşüncələri ancaq gəlib buraları görəndə və yaşayanda düzgün formalaşır.

Vətəndaşlarımıza da müsbət mənada təsiri olur. Məsələn, həmin turnirlərin təşkil olunduğu bölgədə xeyli iqtisadi canlanma yaşanır. Sakinlərin dünyagörüşü artır. İdman və mədəniyyət turnirlərinin keçirildiyi yerlərdə müəyyən işlər görülür və bu işlər birbaşa xalqa xidmət edir.

Niko Heymel: - Məsələn, bizdə 2006-cı ildə futbol üzrə Dünya Çempionatı keçirilmişdi. Hələ Üçüncü Reyxin vaxtından Almaniya beynəlxalq idman yarışlarına ev sahibliyi edirdi. Biz olduqca qonaqpərvər və tolerant xalqıq. Bu cür turnirlərin ölkə imicinə təsiri göz qabağındadır. Düşünürəm ki, bütün dünya almanları mehriban və qonaqpərvər bir xalq kimi tanıyır.

Kənan Şamilov: - Azərbaycan ev sahibliyi etdiyi turnirlərin həmişə maksimal dərəcədə yüksək səviyyədə keçirilməsinə çalışır. İnsanlarına təsirinə gəldikdə isə necə deyərlər, gör-götür dünyasıdır. Avropaya inteqrasiya olunduğumuz bir dövrdə bu turnirlərin insanların geyim, həyat tərzini necə dəyişdirməsinin şahidi olarıq. Çox uzağa getməyək, Bakıya yuxarıdan quş baxışı ilə baxsanız və indiki vaxt ilə "Avroviziya" yarışmasından qabaq halını müqayisə etsəniz, bu tip qlobal yarışmaların, turnirlərin birbaşa təsirini görmüş olacaqsınız. Avropalaşmağa doğru gedən bir ölkədə bu cür turnirlərin keçirilməsi vacibdir.

– Sizcə, hansı dünya miqyaslı hadisə ölkənizin tanınmasında mühüm rol oynayıb?

Əhməd Adar: - Sözsüz ki, ən ciddi və əhatəli idman növü formula oyunlarıdır. Bu turnirin İstanbulda keçirilməsi əlamətdar hadisə idi. Formulanın hazırlanması üçün ciddi investisiya tələb olunur. Bu kimi idman növü ölkənin tanınmasında, onun müəyyən mənada inkişafında mühüm rol oynayır.

Niko Heymel: - 2014-cü ildə Almaniyanın futbol üzrə milli komandasının qazandığı uğur, məncə, son illərin ən sevindirici və ürəkaçan hadisəsidir. Alman futbolu tarix boyu sevilib və seçilib. 2014-cü il Dünya Çempionu adına layiq görülməyimiz dünyada alman futbolunun təkrarolunmaz olduğunu bir daha sübut etdi və xeyli insan bu uğurdan sonra alman yığmasına azarkeşlik etməyə başladı. Düzdür, iki gün əvvəl Barselona komandası ilə keçirilən oyunda o qədər də parlaq oyun nümayiş etdirmədik, amma hər şey yaxşı olacaq.

Kənan Şamilov: - Hər bir azərbaycanlıya məlumdur ki, Azərbaycanda idmana qarşı xüsusi diqqət var. İdmançılarımızın beynəlxalq turnirlərdə daim mükafat qazanmaları buna ideal nümunədir. Bu il Avropa Oyunlarının ölkəmizdə keçirilməsi, zənnimcə, Azərbaycanın tarixinə qızıl hərflərlə ömürlük yazılacaq. Bundan başqa, "Avroviziya" mahnı müsabiqəsindəki qalibiyyət Azərbaycanın həm siyasi, həm də mədəni müstəvidə tanınmasında əhəmiyyətli dərəcədə rol oynadı.

– Bu il Azərbaycanda keçiriləcək İlk Avropa Oyunlarını necə qiymətləndirirsiniz? Bunun Azərbaycan üçün hansı nəticələri olacaq?

Əhməd Adar: - Bu il Azərbaycanda keçiriləcək oyunlar ölkənin daha geniş arenada tanınmasında böyük rol oynayacaq. Azərbaycan bu kimi tədbirlərdən həmişəki kimi alnıaçıq, üzüağ çıxacaq. Avropa Oyunlarının necə yüksək səviyyədə təşkil olunmasının bütün dünya ölkələri görəcək.

Niko Heymel: - Bu, əlbəttə ki, ürəkaçan haldır. Mən Azərbaycanda səfərdə olmuşam. Əvvəla, onu qeyd edim ki, möhtəşəm şəhəriniz və qızlarınız var. Doğrudan da, adamın gözləri istirahət edir. Gəlib hicablı qadınlarla rastlaşacağımı düşünürdüm, amma gördüm ki, Bakı meqapolisdir, müasir, tolerant şəhərdir. Avropa Oyunları, şübhəsiz ki, sizin ölkənin imicinə müsbət təsir göstərəcək. Bura həm iqtisadi, həm sosial, həm də siyasi amillər daxildir. İlk Avropa Oyunlarını ölkənizdə keçirilməsi böyük addımdır. Bir alman istəyirəm ki, bu məsuliyyətin altına girsin… (gülür)

Kənan Şamilov: - Bu, çox gözəl haldır. İlk Avropa Oyunlarından sonra da Azərbaycanla bağlı "Əvvəl" və "Sonra" adlı bir şəkil yaratsaq, yenə də ölkənin necə dəyişdiyinin, gözəlləşdiyinin, hər bir sahədə inkişaf etdiyinin şahidi olacağıq.