Formula-1 üzrə Azərbaycan Qran-Prisi çərçivəsində şənbə günü Bakıda konsert proqramı ilə çıxış etməsi planlaşdırılan dünya şöhrətli ulduz Sem Smit Bakıya gəlməyəcək.

Kult.az xəbər verir ki, bu barədə qran-prinin rəsmi səhifəsində qeyd edilib. Müğənnin səhhətində yaranan problemlər səbəbindən səfərin baş tutmadığı bildirilib:

“Dərin təəssüf hissi ilə bildiririk ki, Sem Smitin şənbə günü Bakıda keçirilməsi planlaşdırılan konserti bizdən asılı olmayan səbəblərdən baş tutmayacaq. Ötən həftə Cənubi Afrika turunu yarımçıq qoymasının ardından Sem həkimlərin tövsiyəsi ilə çıxışlarına fasilə verməli olub.

Ümid edirik ki, Sem tez bir zamanda səhhəti ilə bağlı problemləri aradan qaldıracaq və yaxın gələcəkdə onu Bakıda qonaq edəcəyik”.

Bakı Şəhər Halqası Əməliyyat Şirkətinin Marketinq və Kommunikasiya Şöbəsinin rəhbəri Nigar Arpadarai Report-a bildirib ki, britaniyalı müğənnini Bakı konsertində həmyerlisi Jessi J əvəzləyəcək.