Bakı Metropoliteni QSC sərnişinlər üçün yeni sosialyönümlü layihəyə start verib. Mayın 25-də dünya şöhrətli bəstəkar və kamança ifaçısı Mark Eliyahu Heydər Əliyev Sarayında konsert proqramı ilə çıxış edəcək. QSC metro sərnişinlərinə bu konsertə bilet qazanmaq fürsəti verir.

Bakı Metropolitenindən Kult.az-a verilən məlumata görə, QSC-nin “Yunayted Kulturs” və “124 Studios” ilə layihəsi məhz bu konsertlə bağlıdır.

Layihənin əsas məqsədi metro sərnişinləri arasından seçiləcək 10 nəfəri Mark Eliyahunun konsertinə biletlə təmin etməkdir.

Bunun üçün sadə bir qeydiyyat prosedurundan keçmək lazımdır: Siz ad, soyad və atanızın adını, doğum tarixinizi, telefon və metroda gediş kartının nömrəsini göstərirsiniz. Seçim “United Cultures” tərəfindən düzgünlüklə və qərəzsiz aparılacaq.

Konsertə artıq bilet almış şəxslər də qeydiyyatdan keçə bilər. Həmçinin əldə olunan biletinizin nömrəsini xüsusi olaraq ayırılmış qrafada göstərməklə Mark Eliyahunun İstanbuldakı konsertinə bilet qazanmaq şansı da əldə edirsiniz. Bu halda sizə təyyarə ilə İstanbula və geri uçmaq, oteldə yaşamaq imkanı və konsert bileti daxil olan paket təqdim olunacaq.