Ölkəni birdəfəlik tərk etmirəm, Vətənə gəlib-gedəcəyəm.

Bu sözləri Kult.az-a açıqlamasında müğənni Elton Hüseynəliyev Türkiyəyə köçməsi ilə bağlı danışarkən deyib. O, Türkiyədə təhsil alacağını da vurğulayıb:

“Elə şeylər var ki, musiqiçi olaraq bunlara dözə bilmirəm. Ölkəni tərk etmirəm, sadəcə olaraq, İstanbula köçürəm, orada yaşayacağam. İşlərim burdadır, Azərbaycana gəlib, efirə çıxacağam. İstanbulda həm də təhsil almağa gedirəm, konservatoriyada oxuyacağam. Çünki Türkiyə orkestrindən və İtaliya operasından iş təklifi almışam. Bununla bağlı danışığa gedirəm. Əgər razılığa gəlsəm, bir müddət orada işləməli olacağam”.

Müğənni sosial şəbəkədə “Gedirəm, didin bir-birinizi pul üçün. Nə qədər şərəfsiz var imiş” sözlərini niyə yazması haqda da danışıb:

“Azərbaycan çox möhtəşəm bir dövlətdir. Sadəcə olaraq, bəzi insanlar hər yerdə işləməməlidirlər. Mən də buna öz etirazımı bildirdim, çünki bəzi səbəblər var. Sözümü demişəm, peşman da deyiləm.

Bəzi adamlar var ki, dostluqlardan istifadə edirlər. Onların da zamanı var. Biz Vətənimizin oğluyuq, gördüyümüz bəzi qüsurları deməliyik. Müəyyən şeylər bilinməlidir. Sən sus, mən susum - heç kim dinməsə, necə olacaq? Tutaq ki, 500 manat maaş verilən bir yerdə pulu kəsərək, 300 manat verirlər. Bu, düzgün deyil. Təhsilini qırmızı diplomla bitirən insan baş verənləri görəndə özündən çıxır.

Bu gün Elton Hüseynəliyevi dövlət Elton edib. Həyatda bir amalım var - insanlara qarşı düz olmaq. Gərək heç kim başqasına yuxarıdan-aşağı baxmasın. Vəzifə bu gün var, sabah yoxdur. İnsan gərək həmişə öz hörmətini saxlasın”.

Qeyd edək ki, bundan əvvəl E.Hüseynəliyev Türkiyəyə köçəcəyini və dönmək fikri olmadığını yazmışdı.