Almaniyalı sənətçi Karen Danger-Manafzadə "Dünya Azərbaycanlılarının Həmrəylik Günü" və Yeni İl münasibəti ilə Azərbaycan xalqını məşhur "Laçın" mahnısı ilə təbrik edib.

Kult.az xəbər verir ki, sənətçi mahnını həyat yoldaşı, Əməkdar artist pianoçu, dirijor, bəstəkar Abuzər Manafzadənin müşayiəti ilə ifa edib.

Karen Danger-Manafzadə bütün azərbaycanlıları təbrik edərək, qeyd edib:

"Mənim sevimli Azərbaycanım!

Hər birinizi qarşıdan gələn "Dünya Azərbaycanlılarının Həmrəylik Günü" və Yeni İl münasibəti ilə ürəkdən təbrik edirik!

Bu gözəl mahnını, "Laçın"ı ilk dəfə 3 il öncə eşitdiyim andan etibarən hər zaman oxumağı arzu etdim. Azərbaycana indiyə qədər üç dəfə səyahət etdim. Ümid edirəm Laçını, Qarabağı görmək də qismət olar.

Vyanadan sevgilərlə, sizin Karen və Abuzər!"

Qeyd edək ki, Karen Danger-Manafzadənin "Laçın" ifası sosial şəbəkədə böyük maraqla qarşılanıb. Yarı alman, yarı kubalı olan sənətçi bundan əvvəl Müslüm Maqomayevin "Azərbaycan", Səid Rüstəmovun "Getmə, getmə gəl" və digər Azərbaycan mahnılarını böyük məharətlə ifa edib.