Türkiyə Xarici İşlər Nazirliyi Şimali Kipr Türk Cümhuriyyətində (ŞKTC) keçirilən prezident seçkilərinin ilkin nəticələri ilə bağlı bəyanat yayıb.

Axar.az xəbər verir ki, rəsmi Ankara ilkin nəticələrə görə ŞKTC rrezidenti seçilən Tufan Ərhürmanı təbrik edib.

"Kiprli türklərin azad və suveren iradəsini, ŞKTC-dəki dövlət ənənəsini və demokratiya mədəniyyətini əks etdirən bu seçkilərin kiprli türklər və bütün ada üçün xeyirli olmasını arzu edirik.

Türkiyə tarixi, hüquqi və humanitar məsuliyyətləri çərçivəsində, adanın reallıqlarına uyğun şəkildə kiprli türklərin əmin-amanlığı, rifahı və inkişafı üçün göstərilən səylərə töhfə verməyə davam edəcək” - XİN-in bəyanatında vurğulanıb.

Qeyd edək ki, Şimali Kipr Türk Cümhuriyyətində (ŞKTC) oktyabrın 19-da keçirilən prezident seçkilərində, ilkin nəticələrə görə, Cümhuriyyətçi Türk Partiyasının sədri Tufan Ərhürman qələbə qazanıb.